ជនពិការកម្ពុជាអំពាវនាវដល់រាជរដ្ជាភិបាលអោយជួយជនពិការទៅតាមផែនការ

ភ្នំពេញៈ ក្រុមអង្កការសង្គមស៊ីវិល តំណាងឱ្យជនពិការកម្ពុជា បានអំពាវនាវ ទៅដល់រាជរដ្ឋាភិបាល ឱ្យជួយ ដាក់បញ្ចូល ជនពិការកម្ពុជា ដែលងាយរងគ្រោះ ទៅក្នុងផែនការ វិនិយោគឃុំ/សង្កាត់  និង ការអភិវឌ្ឍន៍ មូលដ្ឋានផង ដើម្បីធ្វើយ៉ាងណា ជួយឱ្យជីវភាពពួកគាត់ កាន់តែប្រសើរឡើង។

លោក ងិន សៅរ័ត្ន ប្រធានអង្គការជនពិការកម្ពុជា បានមានប្រសាសន៍ថា ជនពិការកម្ពុជាសព្វថ្ងៃ នៅតែប្រឈមនឹងបញ្ហាជាច្រើន ទាំងបាត់បង់ ឱកាសផ្សេងៗ និងភាពក្រីក្ររួមរឹត ដែលទាមទារឱ្យមានការ យកចិត្តទុកដាក់ខ្ពស់ ពីសំណាក់អ្នកតាក់តែង គោលនយោបាយទាំងថ្នាក់លើ និង ថ្នាក់មូលដ្ឋាន ។

លោកបានមានប្រសាសន៍ ដោយអំពាវនាវថា “ក្នុងនាមអង្គការ ជនពិការកម្ពុជា សូមអំពាវនាវ ឱ្យរដ្ឋាភិបាល មានកញ្ចប់ថវិកាពិតប្រាកដ ក្នុងការជួយជនពិការ ដោយសារតែ យើងយល់ឃើញថា អ្នកដែលក្រីក្រជាងគេបំផុត គឺជាជនពិការ ដោយសារតែគាត់ក្រហើយ ពិការកាយទៀត គាត់បាត់បង់ កាយសម្បទាណាមួយទៀត ។ អញ្ចឹងមានន័យថា ការបាត់បង់កាយសម្បទា បូករួមនឹងឧបសគ្គ បូកនឹងគ្មានថវិកា វានឹងធ្វើឱ្យ ជនពិការទាំងនោះ ក្រកាន់តែខ្លាំងឡើងៗ” ។

លោកបានបន្ថែមថា “យើងចង់ឱ្យអ្នកតាក់តែង គោលនយោបាយទាំងអស់នោះ មានអារម្មណ៍ថា បញ្ហាពិការភាព ជាបញ្ហាអន្តរវិស័យ ។ អញ្ចឹង បើសិនជាករណី បញ្ហាអន្តរវិស័យ ត្រូវតែបញ្ចូលជនពិការ ហើយត្រូវតែ មានថវិកាពិតប្រាកដ” ។

បើតាមលោក ងិន សៅរ័ត្ន ការបញ្ចូលជនពិការកម្ពុជា ទៅក្នុងការអភិវឌ្ឍន៍ឃុំសង្កាត់ នៅមានកម្រិតតិចតួចនៅឡើយ ហើយការផ្តល់ ថវិកាសម្រាប់ជនពិការ ក៏មិនមានលក្ខណៈច្បាស់លាស់ នៅឡើយដែរ ។លោកថា បើសិនជា មិនបញ្ចូលជនពិការ ទៅក្នុងផែនការវិនិយោគឃុំទេ ផែនការវិនិយោគឃុំ មិនអាចសម្រេចបានឡើយ ហើយភាពក្រីក្រ នឹងមានកាន់តែច្រើនឡើង។

គួរបញ្ជាក់ថា បើតាមការអះអាង របស់តំណាងជនពិការរូបនេះ តួលេខរបស់ WORLD BANK បានរកឃើញថា ជនពិការកម្ពុជា បច្ចុប្បន្ន មានប្រមាណ ១០-១៥ភាគ ហើយថា តាមក្រសួងសង្គមកិច្ច  បានរកឃើញ ត្រឹមតែ ១.៤ភាគរយ ៕
Thursday, 19 December 2013 18:07 ដោយៈដើមអម្ពិល ID:037