ខេត្តសៀមរាប ៖ សមត្ថកិច្ចមូលដ្ឋានសង្កាត់ស្រងែបានឱ្យដឹងថា មនុស្ស២នាក់ជាអតីតប្តីប្រពន្ធនឹងគ្នាបានស្លាប់ក្នុងអណ្តាតភ្លើង ចំណែកកូនប្រុស-ស្រី២នាក់រងរបួសស្រាលនៅក្នុងអំពើហិង្សាក្នុងគ្រួសារមួយ ។ អំពើហិង្សានេះបានផ្ទុះឡើងកាលពីវេលាម៉ោងជាង១២រំលងអធ្រាត្រឈានចូលថ្ងៃទី៤ កុម្ភៈ ក្នុងក្រុមទី៨ ភូមិកសិកម្ម សង្កាត់ស្រងែ ជាយក្រុងសៀមរាប ខណៈបុរសជាអតីតប្តីបានបរាជ័យទៅនឹងសំណើសុំជួបជុំប្រពន្ធកូនវិញ ក៏រៀបចំគម្រោងការគំរាមស្ត្រីជាប្រពន្ធ ដោយទិញប្រេងសាំងចាក់នៅជុំវិញផ្ទះឱ្យឆាបឆេះយ៉ាងសន្ធោសន្ធៅធ្វើឱ្យអតីតប្តីប្រពន្ធទាំង២នាក់ត្រូវស្លាប់ក្នុងភ្លើង ។
មេបុ៉ស្តិ៍នគរបាលសង្កាត់ស្រងែ លោកអនុសេនីយ៍ត្រី ស៊ុយ សេងអុី បាននិយាយកាលពីព្រឹកថ្ងៃទី៤ កុម្ភៈថា ឈ្មោះ ងី រស្មី ភេទស្រី អាយុ២៨ឆ្នាំ ជាប្រពន្ធបានស្លាប់ភ្លាមៗនៅក្នុងអណ្តាតភ្លើងទាំងកណ្តាលរាត្រី ។ ដោយឡែកបុរសជាអតីតប្តីឈ្មោះ លឿម ហាំ អាយុ៤៣ឆ្នាំ មានស្រុកកំណើតនៅខេត្តបាត់ដំបង រងរបួសធ្ងន់រលាករលួយពេញរាងកាយ និងបានស្លាប់ដោយសារក្រុមគ្រូពេទ្យពុំមានលទ្ធភាពសង្គ្រោះបាន ព្រោះឆេះរលួយស្ទើរឆ្អិនខ្មៅទៅហើយនោះ។ ចំណែកកូនតូចៗទាំងពីររងរបួសស្រាលម្នាក់ឈ្មោះ លឿម សុខហម ភេទស្រី អាយុ១០ឆ្នាំ និងម្នាក់ទៀតឈ្មោះ លឿម សីហា ភេទប្រុស អាយុ៦ឆ្នាំ ។ លោកមេបុ៉ស្តិ៍បានបញ្ជាក់ថា ប្តីប្រពន្ធនេះបានសម្រេចលែងលះ និងស្នាក់នៅផ្សេងគ្នាអស់រយៈពេលជិត១ឆ្នាំមកហើយ បុ៉ន្តែបុរសជាប្តីនៅមិនអស់ចិត្តនឹងប្រពន្ធកូន ចេះតែសុំផ្សះជានាគ្នាវិញ ហើយនៅក្បាលព្រលប់មុនពេលកើតហេតុ បុរសជាអតីតប្តីបានហៅតាមទូរស័ព្ទមកសុំប្រពន្ធផ្សះផ្សាម្តងទៀត តែត្រូវនាងបដិសេធដដែល ។ លុះដល់វេលាម៉ោងជិត១២យប់ បុរសជាប្តីក៏លបមកផ្ទះប្រពន្ធ ដោយបានទិញប្រេងសាំងមកចាក់នៅបរិវេណជុំវិញផ្ទះដើម្បីគំរាមប្រពន្ធ ហើយដុតតែម្តងដែលជាគម្រោងគិតទុកជាមុន ។
លោកបានបញ្ជាក់ថា ពេលដុតឆេះសន្ធោសន្ធៅហើយនោះ ស្ត្រីជាប្រពន្ធក៏ស្ទុះចេញមកក្រៅផ្ទះ ខណៈនោះបុរសជាអតីតប្តីក៏បានចាប់ឱបស្ត្រីជាប្រពន្ធផ្តួលទៅលើដី និងរមៀលចូលទៅក្នុងអណ្តាតភ្លើងដែលកំពុងតែឆាបឆេះបណ្តាលឱ្យឆេះខ្លួនដូចដុតទាំងរស់ ។ ដោយឃើញស្ថានការណ៍ដូច្នេះ ជនបង្កក៏ស្ទុះចូលទៅក្នុងផ្ទះឱបបីកូនប្រុសស្រីទាំង២រត់ចេញផុតពីអណ្តាតភ្លើង រួចក៏ត្រឡប់ទៅត្រកងប្រពន្ធដែលកំពុងត្រូវភ្លើងឆេះពេញរាងកាយមកឱបផ្អប់ជាប់នឹងទ្រូងឈរផ្អែកជញ្ជាំងផ្ទះ ដោយមិនខ្វល់ពីកម្តៅព្រះអគ្គីដ៏សាហាវនេះឡើយ ។ លោកបានបន្ថែមថា តាមការពិនិត្យជាក់ស្តែងនូវទង្វើរបស់បុរសជាប្តី ពុំមានចេតនាដុតសម្លាប់ប្រពន្ធកូនទេ គឺទំនងជាគំរាមឱ្យប្រពន្ធផ្សះជាគ្រួសារវិញ ក៏ជ្រុលដំណើរក្លាយជាសោកនាដកម្ម ទើបសម្រេចចិត្តសង្គ្រោះកូនចេញពីក្នុងផ្ទះ ហើយសុខចិត្តបណ្តោយឱ្យភ្លើងឆេះស្លាប់ជាមួយប្រពន្ធបែបនេះទៅ ។
នៅក្នុងហេតុការណ៍នោះមិនមានអ្នកនៅក្បែរណាមកជួយអន្តរាគមន៍ទាន់ពេលទេ ដោយសារតែយប់ជ្រៅមនុស្សម្នាបានដេកលង់លក់គ្រប់គ្នា ទម្រាំដឹងស្ថានការណ៍បានហួសពេលអស់ទៅហើយ ។ ថ្វីបើយ៉ាងនេះក្តី នេះគឺជាទង្វើមួយដែលពុំគួរអ្នកផងទាំងពួងយកគំរូតាមទេ ព្រោះជាកំហុសធ្ងន់បំផុតមួយ និងជាអំពើបាបកម្មដែលមិនមានឱកាសសាងអំពើបុណ្យមកស្រោចស្រង់បានឡើយ ។
នៅក្នុងហេតុការណ៍នោះមិនមានអ្នកនៅក្បែរណាមកជួយអន្តរាគមន៍ទាន់ពេលទេ ដោយសារតែយប់ជ្រៅមនុស្សម្នាបានដេកលង់លក់គ្រប់គ្នា ទម្រាំដឹងស្ថានការណ៍បានហួសពេលអស់ទៅហើយ ។ ថ្វីបើយ៉ាងនេះក្តី នេះគឺជាទង្វើមួយដែលពុំគួរអ្នកផងទាំងពួងយកគំរូតាមទេ ព្រោះជាកំហុសធ្ងន់បំផុតមួយ និងជាអំពើបាបកម្មដែលមិនមានឱកាសសាងអំពើបុណ្យមកស្រោចស្រង់បានឡើយ ។
បច្ចុប្បន្នសពស្ត្រីរងគ្រោះត្រូវបានក្រុមសាច់ញាតិរៀបចំធ្វើបុណ្យទៅតាមប្រពៃណីនៅឯគេហដ្ឋានក្នុងភូមិកើតហេតុ ។ ចំណែកសពបុរសជាប្តីមិនត្រូវបានអនុញ្ញាតឱ្យធ្វើបុណ្យរួមគ្នាជាមួយប្រពន្ធទេ ទោះជាកាលពីគាត់នៅរស់បានទទូចសុំនៅរួមរស់ជាមួយប្រពន្ធកូនសាជាថ្មីក្តី គឺត្រូវសាច់ញាតិបងប្អូនដឹកយកទៅខេត្តបាត់ដំបង ដែលជាស្រុកកំណើតឱ្យឆ្ងាយពីសពប្រពន្ធ ព្រោះជាមនុស្សខូច ។ គួរបញ្ជាក់ផងដែរថា កាលពីឆ្នាំកន្លងទៅនៅក្នុងភូមិកើតហេតុខាងលើនេះ ក៏មានផ្ទុះកំហឹងស្រដៀងគ្នានោះម្តងដែរ បណ្តាលឱ្យមនុស្សយ៉ាងតិច២នាក់រងរបួសដោយសាររលាកភ្លើង និងត្រូវបានដឹកទៅសង្គ្រោះនៅមន្ទីរពេទ្យ។
0 comments:
Post a Comment